प्रधानमन्त्री बालेन साहले पक्राउ परेका पत्रकारहरूलाई तत्काल रिहा गर्न निर्देशन दिएका छन्। साथै, समाचार कक्षमा कुनै पनि प्रकारको धरपकड नगर्न पनि उनले निर्देशन दिएको जनाइएको छ।
प्रधानमन्त्रीको प्रेस तथा अनुसन्धान विभागका उपाध्यक्षले सामाजिक सञ्जालमार्फत सार्वजनिक गरेको स्टाटसमा प्रधानमन्त्रीले पक्राउ परेका पत्रकारहरूलाई तत्काल रिहा गर्न र सञ्चारगृहमा धरपकड नगर्न निर्देशन दिएको उल्लेख छ।
उनका अनुसार प्रधानमन्त्री साहले पत्रकारहरूलाई पक्राउ गर्ने, धरपकड गर्ने वा कारबाही गर्ने कुनै आदेश नदिएको स्पष्ट पारेका छन्। पत्रकार पक्राउ परेको घटनाबारे आफूलाई कुनै जानकारीसमेत नभएको प्रधानमन्त्रीको भनाइ रहेको उनले जनाएका छन्।
पछिल्लो समय न्यायाधीश र राजनीतिक व्यक्तिहरूबीचको कथित साँठगाँठलगायत विभिन्न भ्रष्टाचार प्रकरणसँग सम्बन्धित समाचार सामग्री प्रकाशित भएपछि पत्रकारहरूमाथि पक्राउ र धरपकड सुरु भएको छ। यस घटनाले प्रेस स्वतन्त्रता र सञ्चारकर्मीको सुरक्षाबारे बहससमेत चुलिएको छ।
