नेपाल प्रिमियर लिग (एनपीएल) को उद्घाटन खेलमा लुम्बिनी लायन्सले सुदूरपश्चिम रोयल्सलाई सात विकेटले पराजित गरेको छ। त्रिवि क्रिकेट मैदानमा भएको खेलमा सुदूरपश्चिमले दिएको सामान्य लक्ष्य लुम्बिनीले सहजै पूरा गरेको हो।
पहिले ब्याटिङ गरेको सुदूरपश्चिम रोयल्सले अपेक्षाअनुसार रन बनाउन सकेन। लुम्बिनीका बलरले सुरुदेखि नै दबाब सिर्जना गरेपछि सुदूरपश्चिमको ब्याटिङ कमजोर देखिएको थियो।
लक्ष्य पछ्याउने क्रममा लुम्बिनीका डार्सी सर्ट र आशिष शेखले पहिलो विकेटका लागि ७१ रनको साझेदारी गर्दै टोलीलाई बलियो सुरुवात दिलाए। सर्टले १८ बलमा चार चौका र तीन छक्का प्रहार गर्दै आक्रामक ब्याटिङ प्रदर्शन गरे।
अन्तर्राष्ट्रिय अनुभव भएका खेलाडीको उपस्थितिसँगै फरक शैलीमा सजाइएको त्रिवि मैदानमा सुरु भएको एनपीएलको पहिलो खेलमा दर्शकले चौका र छक्काको रोमाञ्चकता देख्ने अपेक्षा गरेका थिए। तर पहिलो इनिङमा सुदूरपश्चिमले अपेक्षित रन बनाउन नसक्दा लुम्बिनीले खेलमा सहज पकड बनायो।
उद्घाटन खेलमै प्रभावशाली प्रदर्शन गरेको लुम्बिनी लायन्सले प्रतियोगितामा सुखद सुरुवात गरेको छ।
