लियानयुङगाङ, चीन — सीमापार दूरसञ्चार तथा साइबर ठगी नियन्त्रणका लागि चीनको पहलमा अन्तर्राष्ट्रिय गठबन्धन स्थापना गरिएको छ।
पूर्वी चीनको जियाङ्सु प्रान्तस्थित लियानयुङगाङमा बिहीबार आयोजित गठबन्धनको उद्घाटन सम्मेलनमा ४६ संस्थापक देश, ३४ पर्यवेक्षक देश तथा संयुक्त राष्ट्रसंघ र इन्टरपोलसहित चार अन्तर्राष्ट्रिय संस्थाका प्रतिनिधि सहभागी भएका छन्।
चिनियाँ सरकारको पहलमा स्थापना गरिएको यो अन्तरसरकारी गठबन्धनले सीमापार दूरसञ्चार तथा साइबर ठगी र त्यससँग सम्बन्धित अपराध नियन्त्रणका लागि विभिन्न देशका कानून कार्यान्वयन गर्ने निकायबीच सहकार्य तथा समन्वय बढाउने उद्देश्य राखेको छ।
पछिल्लो समय डिजिटल प्रविधिको विस्तारसँगै अन्तरदेशीय दूरसञ्चार तथा साइबर ठगीका घटना बढ्दै गएपछि त्यसविरुद्ध अन्तर्राष्ट्रियस्तरमा सहकार्य आवश्यक रहेको भन्दै गठबन्धन गठन गरिएको हो।
लियानयुङगाङमा आयोजित सम्मेलनबाट सदस्य राष्ट्रहरूबीच सूचना आदानप्रदान, कानून कार्यान्वयनमा सहयोग तथा सीमापार साइबर अपराध नियन्त्रणका लागि संयुक्त प्रयासलाई थप प्रभावकारी बनाउने अपेक्षा गरिएको छ।
तस्बिर : लियानयुङगाङमा बिहीबार आयोजित अन्तर्राष्ट्रिय दूरसञ्चार तथा साइबर ठगीविरुद्धको गठबन्धनको उद्घाटन सम्मेलनमा सहभागी प्रतिनिधिहरू।
तस्बिर : सिन्ह्वा/यिन गाङ
