इनरुवा । सुनसरीमा श्रीमतीले २६ वर्षीय श्रीमानको हत्या गरेको सुनसरी प्रहरीले जनाएको छ । इनरुवा नगरपालिका ७ चान्दबेला स्थित मुसहरी टोल बस्ने २६ वर्षका मुकेश ऋषिदेवको हत्या उनकै श्रीमती विमला ऋषिदेवले गरेको सुनसरी प्रहरीका प्रवक्ता डिएसपी ज्ञानेन्द्र प्रसाद फुयालले जानकारी दिए ।
सुनसरी प्रहरीलाई स्थानीयबासीले खबर गरेपछि घटनास्थलमा पुगेको प्रहरी टोलिले मृत अवस्था मुकेश ऋषिदेव आफ्नै घरमा फेला परेको डिएसपी फुयालले बताए । आइतबार राति नै हत्या भएको र सोमबार बिहान प्रहरीले मृतलाई पोस्टमार्टमको लागि धरान पठाएको डिएसपी फुयालले बताए । मृत मुकेशको टाउमा चोट लाग्नुका साथै घाटीमा कपडा बेरिएको अवस्थामा शव फेला परेकोले हत्या भएको देखिएको डिएसपी फुयालको भनाइ छ । श्रीमानको हत्यापछि मृतका श्रीमती विमला ५ वर्षीया छोरी र ३ वर्षीय छोरा लिएर फरार छन् भने उनको खोजतलास लाई तीव्रता दिएको फुयालले बताए । यसबारे थप अनुसन्धान भैरहेको सुनसरी प्रहरीले जनाएको छ ।
