दशैंमा उपत्यका छोड्ने क्रम बढ्दो, चेकजाँचमा कडाई

काठमाडौं

दशैंका लागि उपत्यकाबाट यात्रुहरु बाहिरिने क्रम जारी छ। लगभग सात लाख जनाले उपत्यका छोडिसकेको काठमाडौं ट्राफिक प्रहरी कार्यालयले जनाएको छ।

हिजो शनिबार र आज आइतबार उपत्यका छाड्नेको ठूलो भिड लागेको छ। काठमाडौंबाट मानिस बाहिरिएसंगै आइतबार र सोमबार उपत्यकामा सवारी जाम कम हुने छ।

ठूला राजमार्गहरुमा सवारी आवतजावतका क्रममा लामो जाम परेका छन् । जाम कम गर्नका लागि प्रहरीले टिपर र ठूला गाडीहरुलाई रातिको निश्चित समय तोकेको छ ।

दसैंलाई लक्षित गरी ट्राफिक प्रहरीले विशेष चेकजाँच शुरु गरेको छ । यात्रुबाहक गाडीमा दुईवटा चालक राखेको नराखेको र यात्रुहरूको अवस्थालाई मध्यनजर गर्दै ,यात्रु ठगिनबाट जोगाउन पनि ट्राफिक प्रहरीले विशेष निगरानी राखेको छ।

यस्तै उपत्यकामा सवारी साधन कम हुने र सडक खालि हुदाँ गति तीव्र हुने भएकाले दुर्घटना हुने सम्भावना बढ्दो छ । त्यसलाई मध्यनजर गर्दै मापासे र लागुपदार्थ सेवनमा कडा चेकजाँच सुरु गरिएको काठमाडौँ ट्राफिक प्रहरी कार्यालयका एसपी अवदेश विष्टले बताउनुभयो।