काठमाडौं । प्रधानमन्त्री बालेन्द्र शाह र राष्ट्रिय स्वतन्त्र पार्टी (रास्वपा) का सभापति रवि लामिछानेबीच लामिछाने निवासमा राजनीतिक छलफल भएको छ। विभिन्न सञ्चारमाध्यमका अनुसार बुधबार भएको भेटवार्तामा नेपाल प्रहरीका महानिरीक्षक (आईजीपी) दानबहादुर कार्कीसँग सम्बन्धित विवाद, सांसद खगेन्द्र सुनारको अडियो प्रकरण र सरकारको अध्यादेश ल्याउने तयारीलगायत विषयमा छलफल भएको हो।
विभिन्न सञ्चारमाध्यमका अनुसार प्रधानमन्त्री शाह लामिछानेको निवासमा करिब चार घण्टा बसेका थिए। लामिछाने भारतको धार्मिक भ्रमणबाट फर्किएपछि भएको भेटवार्ताबारे भने दुवै पक्षले छलफलका विषयमा औपचारिक विवरण सार्वजनिक गरेका छैनन्।
भेटवार्तामा आईजीपी कार्कीसँग सम्बन्धित विषयले पनि स्थान पाएको समाचारमा उल्लेख छ। निर्वाचनका क्रममा प्रहरी पोसाक खरिदसम्बन्धी विवाद र त्यसको छानबिनका विषयमा संसदीय तहमा छलफल भइरहेका बेला प्रहरी नेतृत्वको विषयले राजनीतिक वृत्तमा चासो बढाएको छ। कार्कीलाई पदबाट हटाउने सम्भावनाबारे विभिन्न सञ्चारमाध्यममा चर्चा भए पनि उनको निलम्बन वा पदमुक्तिबारे आधिकारिक निर्णय सार्वजनिक भएको छैन।
त्यस्तै, रास्वपा सांसद खगेन्द्र सुनारसँग जोडिएको विवादित अडियो प्रकरण र त्यसबारे पार्टीले गरिरहेको आन्तरिक छानबिनका विषयमा पनि छलफल भएको बताइएको छ। सरकारले संघीय निजामती सेवासम्बन्धी अध्यादेश ल्याउने तयारी गरेको विषयसमेत भेटवार्ताको एजेन्डामा रहेको समाचारमा उल्लेख छ।
यद्यपि, पूर्वप्रधानन्यायाधीश चोलेन्द्रशमशेर जबरासँग सम्बन्धित विषय तथा अर्थमन्त्री स्वर्णिम वाग्लेको भारतमा दिएको भनिएको अभिव्यक्तिबारे पनि छलफल भएको भन्ने विवरणको सार्वजनिक भएका छन् ।
प्रधानमन्त्री शाह र सभापति लामिछानेबीच भएको भेटवार्ताको विस्तृत विवरण सार्वजनिक नभएकाले छलफलका विषय र त्यसबाट हुन सक्ने निर्णयबारे अहिले नै निष्कर्ष निकाल्न सकिने अवस्था छैन।
