युक्रेनको निप्रो रेलवे स्टेसनको भीडभाड भएको प्लेटफर्ममा रुसी ड्रोन ठोक्किँदा बिहीबार कम्तीमा १३ जनाको मृत्यु भएको अधिकारीहरूले बताएका छन् ।
त्यहाँ रेलहरू पार्क गरिएका थिए । युक्रेनी राष्ट्रपति भोलोदिमिर जेलेन्स्कीले आक्रमणलाई ‘भयानक’ बताउँदै रुसीहरूले ‘यात्रु रेल राखिएको’ प्लेटफर्ममा आक्रमण गरेको बताउनुभयो ।
“दुर्भाग्यवश, अहिलेसम्म १३ जनाको मृत्यु पुष्टि भएको छ,” उहाँले युक्रेनी उद्धार सेवाका तस्बिरहरू पोस्ट गर्दै सामाजिक सञ्जालमा लेख्नुभएको छ ।
तस्बिरमा प्लेटफर्ममा ठूलो खाडल परेको देखिन्छ, नजिकै जलेको रेल छ जहाँ छरपष्ट अवस्थामा मृत शरिरहरू छन् । रेलका झ्यालहरू फुटेका छन् । युक्रेनी राष्ट्रिय प्रहरीले यो आक्रमणमा कम्तीमा १० जना घाइते भएको बताएको छ ।
युक्रेनी रेलवेले जेट–सञ्चालित रुसी ड्रोनले निप्रो रेल स्टेसनको प्लेटफर्ममा प्रहार गरेको बतायो, “जहाँ त्यस बेला ट्रेन नम्बर ८६६ निप्रो–जापोरिज्झिया थियो।” रेल कम्पनीका प्रमुख ओलेक्सान्द्रे पत्र्सोभ्स्कीका अनुसार यो ‘भयानक’ आक्रमण थियो ।
“प्लेटफर्ममा दुर्घटनापछि पनि ठूलो सङ्ख्यामा मानिसहरू थिए,” उहाँले फेसबुकमा लेख्नुभएको छ।
रुसले सन् २०२२ को आक्रमणको पहिलो दिनदेखि नै युक्रेनभरका रेलहरूमा ड्रोन प्रहार गर्दै आएको छ । सयौँ ठूला सवारी साधन नष्ट गरेको छ र धेरै रेलकर्मीहरूको ज्यान लिएको छ । “सेप्टेम्बरमा मात्रै रुसी ड्रोन आक्रमणको खतराका कारण पाँच हजार ८०० भन्दा बढी यात्रुहरूलाई रेलबाट खाली गराइएको थियो,” युक्रेनी राष्ट्रिय रेल सञ्चालक निकायले एएफपीसँग भनेको छ।
जेलेन्स्कीले यो आक्रमणले ‘अमेरिका र युरोपबाट रुसी वृद्धिविरुद्ध निष्पक्ष र निर्णायक कदम आवश्यक छ’ भन्ने देखाएको बताउनुभयो ।
उहाँले यस महिना अमेरिकी राष्ट्रपति डोनाल्ड ट्रम्प र रुसी समकक्षी भ्लादिमिर पुटिनबीच भएको सम्झौताको कडा आलोचना गर्नुभएको थियो ।
सहमतिले रुसमाथि केही प्रतिबन्ध खुकुलो पारेर मस्कोलाई विश्व बजारमा डिजेल बिक्री गर्न अनुमति दिएको छ।
“केही रुसी धनाड्य र ऊर्जा क्षेत्रमाथि प्रतिबन्ध हटाइएपछि यसले तनाव घटाउनुको सट्टा रुसले हाम्रा जनताविरुद्ध कति यस्ता आतङ्कवादी आक्रमण गरेको छ?” उहाँले साध्नुभयो ।
“यो रुसी युद्ध जारी रहेसम्म मस्को र यसको युद्ध संरचनाविरुद्धका प्रतिबन्ध कमजोर पारिनु हुँदैन,” उहाँले भन्नुभयो ।
“युरोपेली सङ्घ, संयुक्त राज्य अमेरिका र जी७ बाट अझ बलियो प्रतिबन्धका कदम लिनुपर्छ,” उहाँले भन्नुभयो ।
चेर्निहिभमा दुई किशोरीसहित युक्रेनका अन्य ठाउँमा भएका रुसी आक्रमणमा कम्तीमा थप पाँच जनाको मृत्यु भएको छ ।
