ट्रम्प परिवारसँग जोडिएको पर्यटन परियोजनाविरुद्ध अल्बानियामा प्रदर्शन, प्रहरीसँग झडप
टिराना, अल्बानिया — अल्बानियाको राजधानी टिरानामा अमेरिकी राष्ट्रपति डोनाल्ड ट्रम्पको परिवारसँग जोडिएको विलासी पर्यटन परियोजनाको विरोधमा भएको प्रदर्शनका क्रममा मंगलबार प्रदर्शनकारी र प्रहरीबीच झडप भएको छ। संसद्को नयाँ अधिवेशन सुरु भएकै दिन प्रदर्शनकारीहरूले संसद् भवनतर्फ अघि बढ्ने प्रयास गरेपछि प्रहरीले उनीहरूलाई रोकेको थियो।
प्रदर्शनकारीहरूले प्रहरीमाथि अण्डा, टमाटर र पानीका बोतल प्रहार गरेका थिए। प्रहरीले संसद् जाने सांसदहरूको सुरक्षा गर्दै प्रदर्शनकारीलाई रोक्न हस्तक्षेप गरेको थियो। केही प्रदर्शनकारीलाई नियन्त्रणमा लिइएको जनाइएको छ।
यो प्रदर्शन जारेड कुशनरसँग जोडिएको अल्बानियाको समुद्री तटमा प्रस्तावित ठूलो विलासी पर्यटन परियोजनाको विरोधमा हुँदै आएको हो। कुशनर ट्रम्पकी छोरी इभान्का ट्रम्पका पति हुन्। परियोजनाले वातावरणमा क्षति पुर्याउने र सर्वसाधारणको समुद्री तटमा पहुँच सीमित गर्ने भन्दै प्रदर्शनकारीहरूले विरोध गर्दै आएका छन्।
पर्यावरणीय प्रभावको चिन्ताका कारण प्रदर्शनकारीहरूले गुलाबी फ्लेमिङ्गोलाई आन्दोलनको प्रतीक बनाएका छन्। त्यसैले यो आन्दोलनलाई ‘फ्लेमिङ्गो रिभोलुसन’ अर्थात् ‘फ्लेमिङ्गो क्रान्ति’ समेत भनिएको छ।
गत मेदेखि सुरु भएको प्रदर्शन मंगलबारसम्म आइपुग्दा १०० दिनभन्दा बढी भइसकेको छ। सुरुमा पर्यटन परियोजनाको विरोधमा केन्द्रित आन्दोलन अहिले प्रधानमन्त्री एदी रामाको नेतृत्वमा रहेको सरकारविरुद्ध व्यापक राजनीतिक आन्दोलनमा समेत परिणत भएको छ।
फोटो क्याप्सन:
अल्बानियाको राजधानी टिरानामा सेप्टेम्बर ८, २०२६ मा ट्रम्प परिवारसँग जोडिएको पर्यटन परियोजनाको विरोधमा प्रदर्शनका क्रममा प्रहरीसँग आमनेसामने हुँदै प्रदर्शनकारी। तस्बिर : एएफपी
