राष्ट्रिय ऋण उठाउने विधेयक आवश्यक रहेको सांसद भण्डारीको भनाइ

२०८३,असार ५ शुक्रबार
काठमाडौं । राष्ट्रिय स्वतन्त्र पार्टीका सांसद बदनकुमार भण्डारी ले राष्ट्रिय ऋण उठाउने विधेयकलाई सर्वसम्मत रूपमा समर्थन गरिएको विषय संसदमा उल्लेख गर्नुभएको छ।

संसदमा बोल्दै उहाँले अर्थमन्त्रीले बजेट निर्माण गर्दा विकास निर्माणलगायत पूँजीगत खर्चको व्यवस्थापन मुख्यतः राष्ट्रिय ऋण उठाउने वा विदेशी ऋण लिने माध्यमबाट हुने गरेको आफ्नो बुझाइ रहेको बताउनुभयो। सांसद भण्डारीका अनुसार आफूले पहिले विदेशी राष्ट्रहरूबाट प्राप्त हुने सहयोग अधिकांश अनुदानका रूपमा आउने ठानेको भए पनि अर्थमन्त्रीसँगको संवादपछि वास्तविकता फरक रहेको थाहा पाएको बताउनुभयो।

उहाँले नेपालमा आउने विदेशी सहायता अधिकांश ऋणका रूपमा रहने र एक खर्ब रुपैयाँ बराबरको पनि अनुदान नआउने जानकारी आफूले पाएको उल्लेख गर्नुभयो। यही कारण विकास निर्माणका लागि आवश्यक स्रोत जुटाउन राष्ट्रिय ऋण उठाउने विधेयक आवश्यक रहेको निष्कर्षमा पुगेको उहाँको भनाइ छ।

सांसद भण्डारीले देशको विकास र पूँजीगत खर्च व्यवस्थापनका लागि ऋण परिचालन अपरिहार्य भएकाले राष्ट्रिय ऋण उठाउने विधेयकको समर्थन गरेको स्पष्ट पार्नुभयो।