मलेसिया प्रहरीका हिरासतमा रहेका आफन्तको रिहाई गरिदिन वैदेशिक रोजगारीको लागि मलेसिया पुगेका नेपाली नागरिकका आफन्तले माग गरेका छन् । पर्सा ठोरी गाँउपालिका वडा न ४ का ४० वर्षीय सुन बहादुर विक र झापाका टंक प्रसाद गौतम अहिले मलेसिया प्रहरीको हिरासतमा छन् ।
उनिहरुलाई हिरासत मुक्त गरी नेपाल आउने वातावरण बनाइदिन सुन बहादुर बिकका छोरा रुद्र बिकले आग्रह गरेका छन् । आफ्नो बुबा सहित टंक प्रसाद समेत निर्दोष भएकाले सक्दो चाँडो हिरासत मुक्त गर्नु पर्ने उनको माग छ ।
उनले नेपालका सम्बन्धित निकायसँग आफ्नो बुबालाई नेपाल झिकाईदिन आग्रह समेत गरे । एउटै कम्पनीमा कार्यरत सहकर्मिको कुटपीटबाट सुपरभाईजरको मृत्यु भएपछि विकसहित २ जना नेपालीलाई मलेसिया प्रहरीले पक्राउ गरेको रुद्रको भनाइ छ । हिरासतमा रहेका बिक र गौतम सुरक्षागार्ड कामका लागी मलेसिया पुगेका हुन् ।